Ҧшьышықәса раахыс Аҧсны Аҳәынҭқарра Ахәаахәҭра-ааглыхратә палата ацхыраара анаҭоит Агәыҳалалратә Фонд «Ахақәиҭра Абаҳча», иагьымҩаҧнагоит В.Г. Арзынба ихьӡ зху Ахақәитра Ашҭа иаду абаҳчаҟны арҧшӡаратә усқәа.

Аҧсны Жәлар рџьынџьтәылатә еибашьра (1992-1993 шш.) аҟны Аиааира Амш аламҭалаз ихыркәшоуп абаҳчаҿы амҩахәасҭа ҿыц алгаразы аусқәа. Уи адагьы алашарбагақәа рҟны асветодиодтә лампочкақәа ҧсахуп, иара убасгьы апрожектор ҿыцқәа 20 ықәыргылоуп.

Ахәаахәҭра-ааглыхратә палатеи АФ «Ахақәиҭра Абаҳчеи» арҧшӡаратә усмҩаҧгатәқәа ҳаҧхьаҟагьы рыцҵара ргәы иҭоуп, иара убасгьы игәыӷуеит, анаплакцәеи ауааҧсыреи рҟынтә ацхыраара ҟалап ҳәа. Уажәазы аусқәа зегь мҩаҧган – агәыҳалалратә проектқәа ирзоужьыз ААП ахатә харџь ала.

Зыӡбахә ҳәоу, Ахақәитра Абаҳча арҧшӡара апроект аҧшьигеит Аҧсны Ахәаахәтра-ааглыхратә палата раҧхьатәи ахада Геннади Леонид-иҧа Гагәылиа.