Ажәабжьқәа

Аԥсны Ахәаахәҭра-ааглыхратә палата аделегациа алахәын Сербиатәи Ареспублика Босниеи Герцеговинеи атәылаҿы имҩаԥысуаз ацәаргақәҵа

23.04.2013

Мшаԥымза 19 инаркны 20-нӡа ақалақь Биелина Сербиатәи Ареспублика Босниеи Герцеговинеи атәылаҿы имҩаԥысит 4-тәи Жәларбжьаратәи атуризми агасторономиеи рцәыргақәҵа «Биелинатурист 2013».

Ацәыргақәҵа аиҿкааҩцәа рааԥхьарала С.Н. Гогәуа напхгара зиҭоз Аԥсны Ахәаахәҭра-ааглыхратә палата аделегациа ари аусмҩаԥгатә рхы аладырхәит. Аделегациа иалахәын: Аԥсны Ахәаахәҭра-ааглыхратә палата Адәныҟатәи аимадарақәеи аинвестициақәеи рыҟәша 1-тәи акатегориа аспециалист Осиа И. Р., Асертификациеи, аустә информациеи, анаплакреи рыҟәша 1-тәи акатегориа аспециалист Даурова И. В., Аԥсны Жәлар Реизара аҟнытә – аекономикатә политикеи, ареформақәеи, аинновациақәеи рзы акомитет алахәыла, Жәлар Реизара адепутат Пачулиа А. Г., Аԥсшьарҭақәеи аныҟәарақәеи рзы аҳәынҭқарратә еилак аҟнытә – ахантәаҩы ихаҭыԥуаҩ Ахба А. И., иара убасгьы Аԥсны аекономика арҿиара апартиа Аҟәатәи аҟәша аиҳабы ихаҭыԥуаҩ Аршба Т. Т.

Ацәыргақәҵа рхы аладырхәит Бырзентәыла, Венгриа, Болгариа, Черногориа, Чехиа, Македониа, Сербиа, Босниеи Герцеговинеи уҳәа атәылақәа жәпакы.

Ацәыргақәҵаҿы Аԥсны атуризм аганахьала алшарақәа иамоу атәы иазааҭгылан, насгьы хкы рацәала ицәырган ақыҭанхамҩатә аалыҵи, ҳтәыла анаплакцәа еиуеиԥшым раалыҵқәеи.

Аԥсны аҭӡы ацәыргақәҵа аҭааҩцәа рацәаҩны иадҵаалон, даара аинтерес рызцәырнагеит.

Аделегациа алахәцәа аҭааҩцәеи абизнесуааи ирзеиҭарҳәон Аԥсны аҭоурых, акультура зеиԥшроу, аалыҵқәас иҳамоу атәы.

Ацәыргақәҵа аҳәаақәа ирҭагӡаны Аԥсны Ахәаахәҭра-ааглыхратә палата аделегациеи Сербиатәи Ареспублика Ахәаахәҭра-ааглыхратә палата ахадареи реиԥылара мҩаԥысит. Аилацәажәарақәа рышьҭахь аусеицуразы аиқәшаҳаҭра рнапы аҵарҩит. Уи инақәыршәаны Аганқәа рҽазыршәалоит анаплакцәа рыбжьара аусуратә еимадарақәа рырӷәӷәареи реизырҳареи, аусеицура ишазыхиоугьы аадырԥшуеит.

Ари аиқәшаҳаҭра европатәи атәылақәеи ҳареи ҳабжьара аусура-економикатә еизыҟазаашьақәа рышьақәыргылара амҩаҿы шьаҿа бзиоуп, уи иабзоураны ҳтәылахь аинвестициақәа ралаҵара еиӷьны имҩаԥыслоит, европатәи атәылақәа рыҩаӡараҿы ҳтәыла ахьӡ рҳәо иҟалоит.