Жьҭаарамза 6 инаркны Румыниа, ақалақь Галац имҩаҧысуеит Жәларбжьаратәи Амшынеиқәаҿтәи Аклуб 25 шықәса ахыҵра иазку аиубилеитә усмҩаҧгатәқәа. Ари Аклуб аҧҵан 1992 шықәсазы ҧхынҷкәын 5 рзы. Уи икоммерциатәым, аиҳабыра иалахәым еиҿкароуп, Амшынеиқәаҿтәи Аекономикатә Усеицура захьӡу аилахәыра аҟны ахылаҧшратә статус змоу, иара убас Еидҵоу Атәылақәа Рхеилак аҟны аекономикатәи, асоциалтәи усбарҭаҟны аконсультативтә статус змоу еиҿкаароуп. Аклуб еиҿкаауп Амшын Еиқәа иаҿықәу атәылақәа рыбжьара аекономикеи, акультуреи, аспорти, иара убас асоциалтә, атехнологиатә хырхарҭақәеи рыла аусеицура арҿиаразы. Аклуб иахьазы иалоуп 28 қалақь, Аҟәа ақлақьгьы уахь иналаҵаны. Аҟәа ақалақь администрациа ахьӡала аклуб Аиубилеитә усмҩаҧгатәқәа дрылахәын Аҧсны Ахәаахәҭра-ааглыхратә палата ахада Геннади Гагәлиа. Аделегациа далахәын иара убас ААП ахада ихаҭыҧуаҩ Тамила Мерцхәлааҧҳа.

Аусмҩаҧгатә еиҿнакааит Галац ақалақь ахадара, Амшынеиқәаҿтәи Аклуби Ассоциациа Технополи рыцхыраарала.

Амшынеиқәаҿтәи Аклуб аиубилеитә еилацәажәара ааиртит уи анагӡаратә директор Ионут Макану. Уи еизаз асасцәа зегьы иҭабуп ҳәа реиҳәеит, ахәылҧаз иахьалахәу азы, лымкаалагьы иҭабуп ҳәа реиҳәеит  Аклуб алахәцәа, иара аҧҵоижьҭеи иҟарҵахьоу аусқәа зегьы рзы.

Асасцәа рахь ааҧхьаратә ажәа иманы дықәгылеит иара убас Галац ақалақь ахада, Аклуб аиҳабы Ионут Флорин Пучеану. Уи иқәгылараҿы иазгәеиҭеит Аклуб аҟазаара аҵак ду шамоу. 

«Аклуб иалахәу зегьы аусеицуразы, еиуеиҧшым аимадарақәа рышьақәыргыларазы алшара бзиақәа рымоуп. Уи иабзоураны акультуратә еиҿцаарақәа рыдагьы ахәаахәҭра аганахьалагьы аизҳарақәа ҟалар ауеит», – иҳәеит иара, ҧхьаҟатәи аусеицура еиҳагьы ишыҿиало азы агәыӷра аарҧшуа.

Ажәахәқәа рыманы иқәгылеит убасгьы атәыла аиҳабыра рхаҭарнакцәа, абизнесуаа, ауаажәларра рхаҭарнакцәа, адипломатцәа, аҵарауаа.

Аиубилеитә еилацәажәара рхы аладырхәит иара убас Амшынеиқәаҿтәи Аклуб Аусуратә Хеилак Икаммерциатәым аилахәыра иалоу ахәаахәҭра-ааглыхратә палатақәа. Аҧсны Ахәаахәҭра-ааглыхратә палата ари ахеилак иалоуп 2007 шықәса инаркны.

Аусмҩаҧгатә аҳәаақәа ирҭагӡаны имҩаҧысит аҭҵаарадырратә конфкеренциа «Дунаи ахықәан».

Жьҭаара 7 рзы Амшынеиқәаҿтәи Аклуб аиҳабы Ионут Флорин Пучеану шықәсык аҩныҵҟатәи Аклуб аусура алҵшәақәа ирызку ажәахә иманы дықәгылеит. Уи ашьҭахь имҩаҧысит Икаммерциатәым аилахәыра «Амшынеиқәаҿтәи Аклуб Аусуратә Хеилак» изаамҭанытәиу аизара. Ҳәарада, Аҧснытәи аделегациагьы уи аизара иалахәын.