Мшаԥымза 17 рзы Сенер Гогәуа напхгара зиҭоз Аԥсны Ахәаахәҭра-ааглыхратә палата аделегациа усуратә визитла Сҭамԥыл ақалақь иаҭааит. Уи аҭаара аҳәаақәа ирҭагӡаны Аԥсуа культуратә центрқәа рфедерациа ахаҭарнакцәеи, ҳдиаспора ахаҭарнакцәеи, абизнес знапы алаку ауааи ирԥылеит.

Аԥсны Ахәаахәҭра-ааглыхратә палата аделегациа аполиетилентә пакетқәа ахьыҟарҵо иреиҳаӡоу азауад иаҭааит, уи аиҳабыс дамоуп Ҭырқәтәылатәи ҳаҳәшьа Рукнет Гәыџьуаи, Аԥсуа культуратә центрқәа рфедерациа аиҳабы ихаҭыԥуаҩысгьы иҟоу. Иахьатәи аамҭазы азауад аус ауеит атехнологиа ҿықәа рхархәарала, мызкахьы 300 тонна аалыҵ ҭнажьуеит, аалыҵ Ҭырқәтәыла адагьы Урыстәылаҟа ирҭиуеит. Аԥсныҟагьы аалыҵ аҭиразгьыы Рукнет аинтерес аалырԥшит.

Абизнесуаа рԥылараан ирылацәажәан Аԥсны Ахәаахәҭра-ааглыхратә палата аусура иазкыз азҵаарақәа, хаҭалагьы уи имҩаԥнаго амаҵурақәа. Аганқәа русуратә еимадарақәа рырҿиаразы, Ҭырқәтәылеи Аԥсныи рнаплакыҩцәа русеицура аизырҳаразы аганқәа ргәаанагарақәа еибырҳәеит.

Аҭаара иалагӡаны Аԥсны Ахәаахәҭра-ааглыхратә палатеи Ҭырқәтәыла иҟоу Аԥсуа культуратә центрқәа рфедерациеи аиқәшаҳаҭра рыбжьарҵеит.