Хәажәкыра 17 Париж иаатит еисышықәсатәи жәларбжьаратәи атуристтә цәыргақәҵа Salon Mondial du Tourisme. Иара иалахәуп 120 тәыла инареиҳаны алахәылацәа, урҭ рхыҧхьаӡараҿы иҟоуп: Румыниа, Италиа, Бырзентәыла, Хорватиа, Бельгиа, Таиланд, Ҭырқәтәыла, Болгариа, Кореиа, Еиду Америка Аштатқәа уҳәа уб.егь.

Аҧсны ари ацәыргақәҵаҿы хаҭарнакыс иамоуп Гагәылиа Геннадии Леонид-иҧа напхгара зиҭо Ахәаахәҭра-ааглыхратә палата аделегациа. Аделагациа иара убас иалахәуп АА ААП Атуризм азы анапхгараҭара аиҳабы Инара Даурова, АА ААП Адәныҟатәи аимадарақәеи аинвестициақәеи рнапхгараҭара аиҳабы ихаҭыҧуаҩ Мерцхәлаа Тамила.

Аҧсны Аҳәынҭқарра акәакь аартра раԥхьатәи аминуҭқәа инадыркны иара аҭаацәа рҟынтәи азҿлымҳара ду аиуит.

«Аиаша уҳәозар, ҳара ҳхаҭақәагьы иџьаҳшьаратәы иҟалеит ари аҩыза азҿлымҳара. Ҳара иҭабуп ҳәан раҳҳәар ҳҭахуп ацәыргақәҵа аиҿкаацәа, урҭ рсаит аҿы аамҭа шыбжьаз аинформациа арҭеит, уи Аҧсны ӡыргарак иазаҩызахеит. Зегьы азҿлымҳауп Аҧсны агеографиатә ҭагылазаашьа, ашәарҭадареи афиза аиуреи рыҧҟарақәа, иара убас атуризм апотенциал», - иҳәеит АА ААП ахада Гагәылиа Геннадии

Иазгәаҭатәуп, ацәыргақәҵа алахәразы заа ирацәаны аусмҩаҧгатәқәа шеиҿкааз.

 «Имҩаҧган акрызҵазкуа аиҿцәажәарақәа, урҭ ирылҵшәаны  Аҧсны ацәыргақәҵа иалахәын ихьаҧшым тәыланы», - иҳәеит Гагәылиа

Иара иазгәаиҭеит ацәыргақәҵа аиҿкаараҿы злагала дуу АА ААП Франциа ахаҭарнакцәа Алина Ашәба-Бетиуни Жан-Кристоф Бетиуни. Иахьа дара русқәа зегьы кажьны ҳделегациа иадгылоуп.

Париж ацәыргақзҵа аартызаалоит хәажәкыра 20, 2016 шықәсанӡа.