Рашәара 19 Аҧсны Аҳәынҭқарра Ахәҳахәҭра-ааглыхратә палатеи Дамасктәи Ахәҳаахәҭра-ааглыхратә палатеи реиҧылара мҩаҧан. АА ААП аделегациа иалахәын: Ахада агәылиа Г.Л., Ахада иабжьгаҩ Кәарацхьелиа Н., АА ААП аусуаҩ Кәартаа Д. Сириатәи аделегациа иалахәын: Дамасктәи ААП ахада Бассель Хамуи, Сириа аекспортерцәа Реидгыла ахантәаҩы Мухадел Нассер аль Саиа.

Иалацәажәан Аҧсныи Сириеи рхәҳаахәҭратә еимадара иазкыз азҵаарақәа. Сириа аиҭашьақәыргылара амҩа ихьанылаз инамаданы азҿлымҳара аиуит Аҧснынтәи Сириаҟа аргыларатә маҭәахәқәа рышьҭра азҵаара.

Дамасктәи ААП ахада иазгәеиҭеит, Аҧсны адгьыылҵакыра аҭыҧ аманшәалара шамоу егьырҭ атәылақәа рахь атауарқәа реихшаразы.

Аиҧылараҿы иалацәажәан еицыҟарҵаша ацәыргақәҵақәеи, еиуеиҧшым жәларбжьаратәи аусмҩаҧгатәқәа раҭаареи азҵаара. Сириа ахаҭарнакцәа, Аҧсны аинвестициатә маншәалареи аекономикатә зҿлымҳареи рыблала ирбаразы аҭактә визитла Аҧсны аҭаара рҭахны иҟоуп.

Аиҧылара ахыркәшаразы Аҧсны Аҳәынҭқарра Аҳәҳаахәҭра-ааглыхратә палатеи Дамасктәи Ахәҳаахәҭра-ааглыхратә палатеи Сириатәи аекспортерцәа Реидгылеи аусецуразы аиқәшаҳаҭра рыбжьарҵеит.