Аҧсны Аҳәынҭқарра Ахәаахәҭра-ааглыхратә палата ахада Тамила Мерцхәлаа лхы алалырхәит есышықәса имҩаҧсыуа Нхыҵ-Кавказтәи афедералтә округи Алада-Кавказтәи афедералтә округи рыхәаахәҭра-ааглыхратә палатақәа Рассоциациа реицеилатәара ду. Хыхь зыӡбахә ҳәоу аокругқәа рҟынтә иааизакны аилатәара иалахәын 48 палата рхадацәа.

Аилатәараҿы ишьҭыхын еиуеиҧшым азҵаарақәеи атемақәеи. Урҭ рхыҧхьаӡараҿы иҟан: апалатақәа русура иадҳәалоу азҵаарақәа; амилаҭтә проект «Имаҷуи ибжьаратәуи анаплакқәеи, аиндивидуалтә наплакытә аҧшьгарақәеи адгылара рыҭара» аларҵәаразы апалатақәа инарыгӡо ароль; Ростовтәи аобласттә Ахәаахәҭра-ааглыхратә палата иамоу аҧышәа; арегионалтә программа инақәыршәаны, имаҷу абизнес арҿиаразы, арегионалтәи амуниципалтәи палатақәеи аҳәынҭқарратә усбарҭақәеи реимадара ашьақәыргылашьа иазку апроблемақәа, иара убас егьырҭгьы.

Аилатәара ашьҭахь, Тамила Мерцхәлааҧҳаи Сергеи Катырини Аҧснытәи ААП аекспертцәа рдыррақәа реизырҳаразы иҟоу алшарақәа ирылацәажәеит. Иалкааны иуҳәозар – аалыҵ ахьҭрыжьыз атәыла ашьақәыргылареи, аалыҵ ахьҭрыжьыз атәыла асертификат арҵабыргреи уҳәа убас егьырҭгьы, Урыстәылатәи Афедерациа Ахәаахәҭра-ааглыхратә палатаҟны иҟоу асистема «ААП Експерт» апрограммала дырҵаразы. Сергеи Катырин иажәақәа рыла, ари азҵаара аӡбараҿы иара иганахьала илшо зегьы ҟаиҵоит.

Иара убасгьы, Ассоциациа аилатәара аҳәаақәа ирҭагӡаны имҩаҧысит Урыстәылатәи Афедерациа ААП аҟны иҟоу Жәларбжьаратәи акоммерциатә абжьаҟазаратә ӡбарҭа Аҟәша. Аусмҩаҧгатә мҩаҧысит Ставрополь, Ставропольтәи атәылаҿацә ахадара ахыбраҿы иҟоу аконференц-зал аҟны.

Аусмҩаҧгатә рхы аладархәит: Урыстәылатәи Афедерациа ААП ахада Сергеи Катырин, атәылаҿацә ахадара ахантәаҩы ихаҭыҧуаҩ Николаи Афанасов, Ставропольтәи атәылаҿацә Абжьаҟазаратә ӡбарҭа ахантәаҩы ихаҭыҧуаҩ имаҵурақәа назыгӡо Марина Керимова, Урыстәылатәи ААП Абжьаҟазаратә центри аиныршәареи адиректор Дмитри Подшибиакин, абизнес-еилазаара ахаҭарнакцәа, иара убас егьырҭгьы.

Сергеи Катырин игәаанагарала, Жәларбжьаратәи акоммерциатә абжьаҟазаратә ӡбарҭа Аҟәша аартра, ҳәарада, акраҵанакуеит арегион аҿы иҟоу ахәаахәҭра-ааглыхратә палатақәа рсистемазы. Акоммерциатә абжьаҟазаратә ӡбарҭа – Урыстәыла адагьы, адунеи зегьы аҟны, иналукаартә иҟоу абжьаҟазаратә усбарҭоуп, 85 шықәса инареиҳаны аҭоурых амоуп.

Урыстәалатәи абжьацәажәаратә усеиларгара иазуз аҧсахрақәа алҵшәақәа ируакхеит – жәларбжьаратәиқәа рыдагьы, аҩныҵҟатәи аимакқәагьы реилыргаразы Жәларбжьаратәи акоммерциатә бжьаҟазаратә ӡбарҭа азин аҭара, иара убасгьы аӡбарҭа иамоуп азин арегионқәа рҟны аҟәшақәа раартразы. Иахьазы Жәларбжьаратәи акоммерциатә абжьаҟазаратә ӡбарҭа аҟәшақәа 17 аартуп.

Жәларбжьаратәи акоммерциатә абжьаҟазаратә ӡбарҭаҟны аимакқәа рыӡбара абизнес азы еиуеиҧшым аҧыжәарақәа амоуп: аҩаӡара ҳаракы змоу абжьаҟазара, аимак аилыргаразы иахушәаауа ахарџь егьырҭ абжьаҟазаратә центрқәа реиҳа еиҵуп, аконфиденциалра апринцип иақәныҟо аусқәа ирыхәыҧшуеит инстанциак аҟны.

Аҧсны ААП ахада лусуратә ныҟәараҿы длыцын Апалата атуризим аҟәша аиҳабы Инара Даурова.