Ажәабжьқәа

Будапешт имҩаҧысуа Жәларбжьаратәи атуристтә цәыргақәҵа иалахәуп Аҧсны

04.03.2016

Аҧсны Аҳәынҭқарра Ахәаахәҭра-ааглыхратә палата ахада Гагәылиа Геннадии напхгара ззиуа аделагациа Аҧсны ахаҭарнакра азнауеит жәларбжьаратәи атуризмтә цәыргақәҵа "Travel Exhibition", иара мҩаҧысуеит Венгриа аҳҭнықалақь Будапешт. Сынтәа ацәыргақәҵа иалахәуп 47 тәыла рҟынтәи 412 туристә фирмақәа.

Иҩычоу Аҧсны акәакь ацәыргақәҵаҿы иразнак азҿлымҳара аиуит аҭаацәеи аиҿкааҩцәеи рҟынтәи. Ауаа азҿлымҳара аадырҧшит Аҧсны аҭоурых азы, иргәарҧханы иахәаҧшуан Аҧсны ахсаалеи аҳәынҭқарратә бираҟи, аҭоурыхтәи иахьатәи аҧсҭазаара аҟынтә афото сахьақәа. Иргәарҧханы аҩи ауаткеи агьама рбон, арасақәа, аџьынџьыхәа, ахәырма рҩа, алаҳарҩа, ацха, аџьыка џьашьахәыла ирыдыркылеит

ААП аусуаҩцәа Даурова Инара, Мерцхәлаа Тамила, Басариа Лана милаҭ цәамаҭәала еилаҳәаз апавилион иаҭаауаз инҭкаканы ирзеиҭарҳәон Аҧсны иазку ажәабжьқәа, иара аҭааразы амҩақәа, уи адагьы ахәаҧшцәа ззыҿлымҳаз аҧсуа џьыкеи аџьанџьыхәеи рыҟаҵашьақәа ртәы.

Иазгәаҭатәуп ҳара ҳҳәынҭқарра аӡбахә ибзианы издыруагьы шыҟаз. Словениа ахаҭарнакра азызуаз атуристтә фирама ахаҭарнакцәа асовет аамҭазы Аҧсны ҧсшьара иаахьан.

Жәларбжьаратәи атуризмтә цәыргақәҵа "Travel Exhibition" аус ауеит хәажәкыра 6 нӡа.